Um dagskrána

Í gegnum árin hafa skapast ýmsar hefðir í dagskrá Gerðubergs auk þess sem alltaf hefur verið gefið rými fyrir spennandi og frumlega viðburði sem jafnt listamenn sem starfsfólk Gerðubergs hefur átt frumkvæði að. Samstarfsaðilar Gerðubergs í gegnum árin skipta hundruðum og alltaf bætast nýir í hópinn.

Ýmsir fastir liðir í starfseminni hafa skipað sér verðugan sess í menningarlífi borgarinnar og má þar nefna sjónþingin, ritþingin og ljóðatónleikana. Eins og gengur hafa ýmsir viðburðir rúllað í nokkur ár og síðan runnið sitt skeið til enda til að gefa rými fyrir eitthvað nýtt. Ber þar fyrst að nefna listsmiðjurnar Gagn og gaman sem starfræktar voru í 18 ár en á þeim tíma jókst framboð á skapandi starfi fyrir börn yfir sumartímann svo um munaði. Það sem þó eftir lifir til að halda minningu þess verðuga starfs á lofti er myndverkasafn Gerðubergs. Í því er að finna um eitt þúsund verk sem unnin voru af börnunum í listsmiðjunum.

Af öðrum liðum má nefna dagskrána Viltu lesa fyrir mig? þar sem rithöfundar lásu fyrir börnin úr nýútkomnum bókum sínum í tengslum við opnun sýningarinnar Þetta vilja börnin sjá! Sýningaröðin Þetta vil ég sjá! vakti líka athygli fyrir óvenjulega nálgun en þar voru þjóðþekktir einstaklingar fengnir til að setja saman myndlistarsýningu á eigin forsendum og varð útkoman oftar en ekki forvitnileg.

Gerðuberg - griðastaður góðra hugmynda!

Auk hinna föstu liða í dagskrá Gerðubergs hafa innlendir og erlendir listamenn jafnan átt greiðan aðgang að Gerðubergi sem hefur tekið inn í dagskrá sína myndlistarsýningar, tónleika, leiksýningar og námskeið af ýmsum toga.

Dagskrá ársins er skipt í tvö tímabil, janúar - júní og ágúst - desember en lokað er vegna sumarleyfa starfsfólks frá júlí og fram í miðjan ágúst. Starfs- og fjárhagsáætlun er unnin í ágúst og september fyrir komandi ár. Tekið er á móti góðum hugmyndum að dagskrárliðum allan ársins hring. Best er að senda inn lýsingu á verkefni ásamt myndefni ef við á í tölvupósti á gerduberg@reykjavik.is. Dagskráin er jafnan fjölbreytt en hvert starfsár hefur ákveðnar áherslur.

Myndlistarfólk getur sótt um að setja upp sýningar í Gerðubergi en þar er að finna fimm sýningarrými; í anddyri á neðri hæð, á gangi og í setustofu á efri hæð, í Boganum, kaffihúsinu og Safnarahorninu. Við val á sýnendum er tekið mið af heildardagskránni hverju sinni. Sýnendur greiða ekki fyrir sýningaraðstöðu.

x